前總理李鵬嘅女兒、中國電力（2380）主席李小琳，噚日低調現身海南博鰲亞洲論壇。近期醜聞纏身嘅佢，心情睇落唔多好。除咗拒答問題外，仲鬼祟提早離場，似乎唔想畀班記者再追問佢圈地嘅事。原本估近排被指喺海南圈地嘅李小琳，唔會現身海南呢個是非地。點知佢最後好低調咁出席咗一個叫「全球能源/資源格局的『變』與『不變』」嘅閉門會議。
佢一蒲頭，當然俾班記者追住問圈地嘅醜聞，但佢只喺拋低咗句「我不會回答這個問題」，就急急腳入場。而一班記者一心諗住等個會議完咗後再咬住李小琳唔放，但佢一早已經金蟬脫殼，個會未完就閃走咗！雖然李小琳日前已急急出嚟澄清話自己冇圈地搞地產，但喺踢爆佢嘅《亞洲週刊》記者紀碩鳴就即時「發炮」還擊，繼續隔空對罵。