陳果執導嘅電影《那夜凌晨，我坐上了旺角開往大埔的紅VAN》今日開畫，前晚喺旺角一間戲院舉行首映，演員任達華、惠英紅、黃又南、徐天佑同文詠珊（JM）等，坐住紅van到戲院吸引市民圍觀，地方擠逼佢哋落車時有啲混亂。
小紅同JM被問到喺旺角出席首映會唔會驚時，小紅話已經黐到實，JM就話好安全，唔怕俾人見到心口個V字，只係怕見到膠紙，因為咁樣即係已經走光。人多手多怕唔怕俾人摸？小紅笑話：「好耐冇俾人摸，有人摸就畀面。」JM照跟小紅咁講：「我都好耐冇俾人摸。」佢話呢排摸佢嘅係男按摩師，佢笑言：「我好鍾意俾人按腳，都幾變態，鍾意好大力，一星期按足5日都得。」
今次演出，小紅自爆因為同監製、老闆都好好朋友，只係收三成片酬：「講明一齊投資，自己嗰份擺番落去，咁樣仲好玩，唔怕超支超時。」JM就話係友情價，佢亦有興趣投資：「講好咗，冇得唔『侵』小女子玩，都想試下做老闆。」
噚日JM同陳果去到中環做電台節目，自言好耐冇拍拖嘅JM提到早排去荷蘭時認識咗位靚仔廚師，佢話：「佢好似C朗拿度咁靚仔，不過暫時接受唔到分隔兩地嘅戀情，但都可以考慮同外國人拍拖。」
撰文：馮仁昭