繼宣佈阿根廷今年10月訪港友賽港隊後，足總行政總裁薛基輔，噚日喺港會場出席下月上演嘅國際7人足球賽抽籤儀式後證實，國際足協（FIFA）主席白禮達今個月底都會訪港，出席足總會址翻新後嘅開幕儀式。
親賀足總會址翻新
阿根廷今年10月最終會唔會嚟香港友賽港隊，賀香港足總成立100周年，薛基輔就話仲傾緊啲細節，之但係曾經出言撐阿根廷球星美斯攞金球獎嘅FIFA主席白禮達，噚日就確認今個月23至24號訪港。雖然足總董事伍健早前喺fb透露，國際刑警日前派員到足總舉行防範假波講座，難免令人聯想白禮達今次訪港，係同屯門、愉園涉打假波案件有關，但薛基輔就一一否認︰「因為足總嘅翻新工程，開支由國際足協撥款，所以白禮達今個月23號抵港後，翌日會出席足總會址嘅開幕儀式，仲會同10個東亞足協嘅要員開研討會，之後佢就會離港。」
雖然白禮達並唔係咩球星，但係佢言行出眾，舊年就讚美斯、踩基斯坦奴朗拿度（C朗），唔知到時有冇本港C朗球迷「一盡地主之誼」，攞上年最受歡迎嘅公仔路姆西，送畀佢老人家做訪港禮物呢？
小港腳7人賽挑戰恒大
講番下個月23至25號喺港會場上演嘅7人賽抽籤（見附表），啱啱贏咗港甲冠軍嘅傑志抽到下籤，編咗入「死亡B組」，要惡鬥英超車路士同新特蘭；而首次派兵出戰嘅中超3連霸廣州恒大，就被編入主賽嘅A組，同組有前屆冠軍紐卡素、港足U23同佔主場之利嘅港會。效力港足U23嘅主力黃威，佢上年代表港隊出戰，雖然只得小組第3，但佢噚日依然信心十足︰「雖然今年對手強過上年，但都有1年經驗，希望贏到紐卡素同恒大！」
至於隊友卓耀國效力嘅港足U21，就編咗入D組，將會硬撼上屆盟主李斯特城同5屆冠軍阿士東維拉。
阿國就話感到莫名興奮︰「我哋少接觸到外隊，都想同佢哋切磋，睇吓大家嘅差距，順道備戰下月尾代表流浪友賽到訪嘅西甲維拉利爾。」
