【第33屆香港電影金像獎頒獎禮之狂舞分子】顏卓靈（Cherry）及蔡瀚億（BabyJohn）兩個新人名字，憑着一部低成本港產片《狂舞派》殺入大後晚的香港電影金像獎頒獎禮，BabyJohn提名最佳新演員，他自爆緊張到接近黐線，壓力爆煲鑽牛角尖！Cherry則坦言對手章子怡太勁，一早打定輸數。兩人憧憬在影圈有一番作為，挑戰更多高難度角色。
撰文：比華利、文國駿
本土電影《狂舞派》於去年上映後，叫好叫座，更爆出兩顆新星─蔡瀚億及顏卓靈，當中Cherry的清新外表加上自然演技，除了俘虜不少男影迷外，更為她帶來華語影壇兩大重要獎項提名─台灣金馬獎及香港電影金像獎的最佳女主角提名。Cherry日前接受本報專訪時，憶述知道獲得金像獎提名時的反應，她說：「我第一時間反應係『係咪㗎？唔好玩喎！』真係好受寵若驚！電影上映後都收到唔少反應，大家都幾鍾意阿花呢個角色，不過金馬、金像獎都有提名就真係完全冇諗過。」
Cherry表示睇好大熱章子怡會獲封影后，她自覺有份參與盛事已相當幸運，她又希望《狂舞派》的其他提名如最佳新演員及新晉導演等可以獲獎。問到獲提名前後的心態可有不同，會否更有自信？她說：「雖然係一個肯定，不過心態同之前差唔多，都係想將自己做到最好。」
新片扮精神分裂
雖然《狂》片中「阿花」討好及受外界接受，但Cherry怕會因而被定型：「有時出街都會俾人『阿花阿花』咁叫我，都有啲怕俾人定咗型係好陽光、儍更更嘅角色，所以我嚟緊會有新嘗試，好似喺新一套電影入面會做精神分裂嘅角色，對我嚟講係個幾大嘅挑戰。」
本來寂寂無名的蔡瀚億，去年憑《狂舞派》柒良一角冒起，他與顏卓靈在觀眾眼中已融為一體，他更獲提名金像獎的最佳新演員，前途無限，BabyJohn日前接受訪問時說：「我對自己有信心，試問邊個唔想攞呢個獎？係一個好大肯定。距離頒獎禮越近，我就越緊張，甚至自覺有啲神經病病徵，需要求醫。」他自爆思想複雜：「我會因為一個問題，衍生好多相關問題。」
望做動作演員
得失已令BabyJohn大鑽牛角尖，他說：「雖然有壓力，但我應付到，好享受呢份壓力，我深信演員喺壓力下成長。」他表示每種感覺都是演員的本錢，要逐一儲起備用，即使此刻紊亂的心情也要謹記，阿Q精神的他說：「將來我要演精神病患者，就可以將呢份感覺拎番出嚟。」
知己知彼，BabyJohn幾乎看完角逐最佳新演員對手的作品，他說：「我都翻睇咗《狂舞派》，顏卓靈演得好，自己可以再好啲。」無論勝敗，他已約齊《狂》片台前幕後於頒獎禮後慶功：「我要狂歡癲番晚，頒獎禮後我就要暫別『柒良』，希望挑戰其他角色。」瘦削的他竟有意做動作演員：「我學緊太極，同時又狂食增磅，希望有機會拍動作片，有啲功夫底，打起嚟都靚啲。」
髮型：Domanic of Orient4
服裝：Ambrym
場地：Souvla
《狂舞派》6項提名：
最佳電影
最佳女主角：顏卓靈
最佳新演員：蔡瀚億
最佳原創電影音樂：戴偉、阿佛
最佳原創電影歌曲：《狂舞吧》
新晉導演：黃修平
資料來源：香港電影金像獎協會
