熊黛林（Lynn）回復單身一年，當外界猜測她還在苦療情傷，她卻神采飛揚地走出來，不想再摻進舊愛的話題中，大概如她所言「冇咗就係冇咗，唔會再諗。」對不快的事，她特別善忘。沒有「活得比你好」式的怨懟，卻享受於單身而活得開心的新生活，至於愛情，就由它慢慢來吧！
撰文：趙潔恆 攝影：周樂恒
造型：顏英儀 化妝：Katherine Tsang
髮型：Cliff CK of Revlon@Pop 8
縱使阿Lynn已經與郭富城分手一年，但人在娛樂圈，戀情舊聞卻是一世隨身的履歷表。面對這段被公眾高度注視的舊情，阿Lynn可會希望下一段戀情是與圈外人發展，低調處理為上？「我從來都冇高調過。其實我又冇乜所謂圈內圈外，不過圈外人可能會易就啲啩。」尋尋覓覓一年，曾傳出與內地演員陳昊及新加坡富商Rodney Lee的緋聞，但伊人終究沒有承認過。
守候愛情來
阿Lynn大方直認還是單身，而且並不心急投入新一段感情。「都唔係咁急，啱啱開始（單身）嗰時會心急啲，因為唔習慣，𠵱家已經習慣咗一個人嘅生活，變得冇咁想拍拖。𠵱家反而好驚（拍拖），擔心自己太習慣單身生活。工作完就返屋企，得閒就同朋友食飯睇戲，𠵱家嘅生活唔錯，單身嘅生活好開心好舒服。」
由心急變為平常心，是因為怕再傷心，不只一次強調自己是理智型的阿Lynn，對戀愛存有一份執着與堅持，「因為我覺得要好認真去揀（男朋友），如果拍散拖嘅話，咁不如唔好拍，我唔鍾意幾個月就hurt嘅感覺。」自認保守派的她寧願看準機會才再為愛出擊，「未遇到啱嘅，咁不如一個人先，慢慢嚟。」真命天子尚未來臨，不過阿Lynn心目中卻勾勒了理想男友的類型，「要係中國人啦、成熟啲嘅、有自己嘅事業、有上進心。」那麼會抗拒姊弟戀嗎？「年紀相差太多又唔得，但如果爭幾年，佢個人又夠成熟，我又覺得冇問題。」
希望做打女
暫時把愛情擱下，事業心重的她除了忙於模特兒正職，拍戲方面亦不停手，來年將接演《葉問3》。早前流傳有人不滿她的演技，但甄子丹月前落實接演並指定要阿Lynn當「老婆」，澄清了傳聞，她也很期待再投入演同一角色，「因為呢部戲有好多fans，有好多人期望好高，所以都會花多啲工夫做準備，睇番頭兩集 ，仲想搵導演傾，睇吓有乜嘢發揮同改善嘅地方。」做慣了一代宗師的老婆，阿Lynn原來想挑戰打女角色，「特別想拍動作片，覺得女仔打功夫好似好型！我唔怕辛苦，拍功夫片通常都要訓練幾個月，越辛苦效果越好，越有成功感，少少瘀傷、流血都唔緊要。」近日她跟黃佩霞學瑜伽，努力keep fit，「練咗幾堂之後 ，覺得身形靚啲，肌肉嘅線條好睇啲，好睇過淨係瘦。」
更多精采時尚內容，盡在 http://add.appledaily.com。