唐宮僭建案終於告一段落，三位專業人士無罪兼得堂費，相信香港人已唔多理呢單官司，但兩年以來，政府選擇性去針對唐英年僭建，運用大量公帑、人力物力去釘死佢，到頭來公眾見到所為何事，但係香港專業及法律界集體沉默，先至得人驚。
三年前由林鄭一手刮起之「打擊僭建運動」，應該壽終正寢了，正因為政治目的已達到，一個官員之操守，由此可見，香港人盲目支持佢，應該係時候清醒清醒。呢個打擊僭建運動，最終不了了之。當日林鄭以為唐英年篤定當選，而唐首選政務司長拍檔乃林瑞麟，當時佢接受《蘋果》訪問表示退休。正如老左一貫分析，臨行前埋個大炸彈，將申訴專員關於政府對付僭建物雙重標準一事發大嚟搞，要雷厲風行對付鄉紳。當時政府內部已覺奇怪，因為林鄭任發展局長時，劉皇發係佢最大政治盟友，點解佢要咁做呢。
當時政府的內部評估根本難以執法，若雷厲風行，只會產生尖銳政治衝突，但林鄭一意孤行，不理其他人意見，包括時任政務司司長唐英年。林鄭成功將僭建設定為政客道德審查標準，上至曾蔭權、孫明揚、林瑞麟、周一嶽，下至名人有錢佬，全部變成道德有問題之人，而更大鑊係訂下咗選擇性運用公權力惡例，屋宇署以傳媒報道作為採取行動標準，將啟動執法權力交予傳媒。
林鄭成最大得益者
而《明報》早已準備好唐宮僭建大炸彈，收晒料去郁唐英年，佢拆彈不當，受僭建醜聞沉重打擊，而更令人疑惑係，同期《明報》也收到梁宅僭建消息，但就因未有充份資料而在選舉時冇公開，在梁登基後先至揭露出來。究竟掌握政府各人及名人僭建資料之「新東廠」，在此過程中有否選擇性tip off傳媒追查，外間不得而知。
大家從結果可以睇到，最大得益者有兩人，梁振英與林鄭，而最後真正得益只有林鄭一人，因梁當選後即被《明報》揭露，誠信大受打擊，民望一路尋底，從冇起色。
僭建門已告一段落，早前羅范為中央擔憂，擔心中央意屬候選人，在2017年選舉中大熱倒灶，出現爆冷結果。其實2012年已爆過一次，假如仍然用小圈子高門檻提名方式，肯定呢三年所有中央意屬者均有可能出現醜聞，惡質政治鬥爭提早上演，半桶水民主化，集獨裁同民主體制弊病於一身，而又冇兩者之好處，結果只有權術家先玩得掂。
由此觀之，下一任人選，非林鄭月娥莫屬！
添馬男