停牌第二日嘅中國家居（692）噚日被揭疑有股東押股，又傳配唔到股，當然要即刻打畀董事局主席黃文彬（Ben），睇吓佢有咩回應喇。電話雖然打得通，但就唔係佢本人。原來，呢個只係一個「假冧巴」。
唔忿氣嘅華華，就決定打去公司搵佢，但唔知呢間公司係咪有少少陣腳大亂，搞到連接線生都講錯嘢。有一位失魂嘅接線生妹妹就話，「你係咪問有關個報道？但係阿Ben同主席暫時唔喺香港喎」。耐人尋味嘅係，呢位妹妹口中嘅「阿Ben」，按道理應該就係主席，點解會話「阿Ben同主席」呢？口中嘅「主席」會唔會係指傳出押股嘅大股東李志雄？一再追問之下，佢先急急補鑊，話「主席佢哋」唔喺香港，「我唔想同你執着字眼，我驚你會寫，當我講錯啦！」