蘇局長對港燦曉以大義：「等多一班地鐵，能提供更多職位給有需要人士。」
你唔耐煩等住上車，竟然會為特區提供到職位，咁又唔同講法，出師有名，各單位快速學習蘇錦樑的官腔：
警隊一哥擺明不會放軟手腳，更多街頭斬傳媒人的血案，上萬人和平佔中，警隊勢必擴充營運，日日招聘。油麻地金毛配合警隊，每晚十二點過後就在地盤叫囂。市民有不滿的話，一哥解畫：「每區多一幫黑社會，催生更多警隊職位。佔中落實，大支裝胡椒噴霧便用得着，唔怕屈係倉底等過期，替庫房慳番唔少公帑。」
同樣道理，只要香港再爆發沙士類型危疾，醫護撥款實鬆手。是以高局長努力喊話：「公院迫爆，市民多等一粒至七粒鐘，間接開拓更多職位，萬一出事，死N個病人換回更多人手資源調配，最終得益的都是市民。」高級公僕幫港出站、出槍、出院，港燦有得撈有飯開，唔恨台灣太陽餅。香港仔關注韓星金秀賢多過學運領袖林飛帆，龍應台唔使嘥口水教路。