【銅鑼灣】由跳水皇后變人妻嘅郭晶晶，去年8月為老公霍啟剛誕下金叵羅霍中曦，前日中午近12點，兩公婆撇甩囝囝去時代廣場嘅Page One打書釘，霍啟剛專心睇旅遊書，佢對一本介紹法國古堡同海邊風景嘅書好有興趣，最終用300蚊買走本書。
當霍啟剛畀完錢離去時，晶晶喺兒童書區追出嚟會合，見到老公即甜笑拖手，由於有其他人等𨋢，晶晶只拖咗兩秒就鬆手，估唔到佢咁怕醜，其間聽到霍啟剛話：「不如去呢度。」晶晶乖巧答：「好呀！」睇嚟佢哋計劃去法國再度蜜月，晶晶入𨋢後耷低頭用長髮遮面，好似日本鬼片貞子咁，估唔到對慣鏡頭嘅佢，咁怕引人注目喎。
採訪、攝影：潘冠恩
