狼振英成日被人指冇叻人可用，唔叻嘅就爭住做，搞到施政亂糟糟；好打得嘅政務司司長林鄭月娥，用人有自己一套，招攬到民主黨大腦羅致光幫佢搞關愛基金，就知林鄭用人之道啦！喺政改問題上，林鄭更加要搵人做嘢，當中仲有好多煲呔心戰室要員，包括一個月前開始擔任政務司司長辦公室做助理專員（特別職務）、專責政改嘅煲呔愛將丘卓恒阿Vic。
丘卓恒獲欽點支援政改
話說林鄭月娥噚日同政制及內地事務局局長譚志源，喺立法會接見新民黨政制小組聽意見時，出席嘅政府代表中，包括煲呔年代出任助理處長（傳媒）、其後任保安局首席助理秘書長嘅Vic。
政改關保安局咩事？其實阿Vic已經有新任務。話說政改關鍵時刻在即，政改三人組需要額外人手支援，呢位煲呔愛將獲欽點，出任林鄭辦嘅助理專員（特別職務），為期兩個半月。
據知阿Vic已經返咗新職位約一個月，預計5月中、即係諮詢期完結後無耐就功成身退。雖則佢𠵱家個位屬林鄭旗下，但據聞阿Vic同政制局較多接觸。
阿Vic表現向來唔錯，難怪先後獲煲呔同林鄭器重。話晒政改都係賭一鋪，梗係要搵番啲叻人幫手，林鄭為咗搞政改，搵咗唔少煲呔當年心戰室嘅成員，其中要同佢拍住上組成政改三人組嘅譚志源，就做過煲呔時代特首辦主任，𠵱家係譚志源政治助理嘅陳岳鵬，就係煲呔前特別助理，加上阿Vic，政改三人組之中，仲有個「煲呔心戰室同學會」㖭。
mailto:[email protected]