歐洲足球壇甚至係體壇，其實話大唔大，話細又絕對唔係細，但可能因為足球員或者係運動員嘅口味往往好相似，所以不時會出現運動員同運動員拍拖，或者係足球員搭上另一球員前度嘅情形。好似曼城翼鋒拿斯尼（右）自從喺2012年同法國女網球手高露雲分手之後，佢哋兩人最新嘅另一半，都咁啱得咁橋係同體壇有關。
26歲嘅高露雲其實已經掛拍，咁後生又咁多時間，就梗係搵拖拍，而佢最新嘅男友係23歲嘅法國欖球員泰迪。佢哋仲愛得好癡纏，最近仲將一張喺水底激吻相post咗出嚟㖭！至於佢嘅前男友拿斯尼亦不遑多讓，同高露雲散咗之後，就搭上模特兒安娜雅（左），佢哋亦都有一鋪將啲親密照放上網嘅癮。唔講唔知，26歲嘅安娜雅就曾經係阿仙奴嘅瑞典翼鋒龍格保女朋友。咦，睇嚟拿斯尼嘅品味同佢嘅兵工廠前輩好一致噃！
照咁睇，如果想打入球圈做WAGs，咁一眾姐妹淘咪要犧牲一下，求其搵件蛋散足球員男友先得囉？唔怪得之咁多所謂球星嘅4、5、6、7線球員，都有咁多女埋身啦！
文：吾中
以女性角度看球星新聞，唔用眉筆用原子筆寫低球壇百態！