坊間成日有人話做三色台嘅藝員人工好奀，佢哋嘅高層可能真係唔多覺。電視廣播（511，TVB）最新年報顯示，近期成日要走上立法會講續牌嘅行政總裁李寶安，舊年加薪24.5%，袋856萬元，當中包括300萬花紅，較前年多兩成。
上市公司高層每年嘅加薪幅度通常按工作表現同埋公司業績而定，公司賺得多，派股息，咁樣畀多啲人工高層，小股東條氣都順啲。但電視廣播舊年盈利基本上冇增長，翡翠台喺平日黃金時段，平均收視又跌至23點，創四年新低，按年流失約12.5萬名觀眾。業績算係相當麻麻，李寶安竟然可以顯著加薪超過兩成，小股東下月到將軍澳電視城出席股東會，應該要質問一下管理層喎。