本文今日見報之時，大家睇到報紙專欄，歐聯四強賽事已產生兩強，多蒙特對皇馬，車路士對巴黎聖約耳門，已有賽果。賽事在歐洲時間四月八日晚上七時四十五分舉行，與香港相差七小時，即係香港星期三四月九日凌晨二時四十五分，C朗fans半夜起身睇直播都幾辛苦。首先預測邊隊贏，左丁山猜想係皇馬，至於車路士，第一回合輸壞三個水皮波（尤其是第三球），今場返回倫敦應該可勝，但贏唔贏得番兩球兼零失球，就無從預測咯，畢竟車路士今季竟然缺乏一名好前鋒，令車仔擁躉難以明白油王與摩連奴究竟搞邊科。
歐亞差七小時，要我地起身睇波好艱難。到咗今年六月世界盃，睇電視直播更加無意思咯，巴西里約熱內盧時間與香港相差十一小時，當地開波時間如在晚上七時半，就係香港早上六時半，香港人要起身返工啦，點睇呀，唯一辦法係用iPad（變相流動電視），但據通訊管理局講，無綫電視冇流動電視牌照噃，況且世界盃轉播權由無綫嘅收費電視台取得，香港有幾多個家庭有訂到無綫嘅收費頻道先？咁講法，左丁山相信今年香港人睇世界盃轉播，人數可能創歷史新低，全城冇厘氣氛。想討論世界盃足球呀，一定係透過網站，《蘋果》嘅網上平台可以大顯身手嘞，唔知《蘋果》有冇已經請定世界盃兼職記者，由晚上十點到次日早上十點，實時在動新聞提供世界盃最update消息呢。
一位體育迷教左丁山到時睇內地「體育吧」網站（tiyuba），據講可以睇到任何電視有得直播嘅賽事！呢類體育網站是否侵權？是否可以入屋（處所，從何沛謙大律師學到嘅名詞），又是否違法？體育迷取笑左丁山：「你估何沛謙、利敏貞會吼住每一個香港住戶睇電視咩？王維基想攞正牌做生意，循規蹈矩就會俾何利兩人叉頸啫，幾大都唔相信佢兩個有膽及有魄力去捉內地體育網站直播世界盃呀。」體育迷所言，未必無理，今年六七月世界盃高潮之時，係網站世界，只可惜老球迷未必識得搜索啫。