一般打工仔，肯定試過朝早上班繁忙時間逼極都上唔到車嘅慘況。噚日立法會交通事務委員會幾位成員，包括田二少、梁耀忠、咖喱范等，搵埋運輸及房屋局副局長邱誠武，一齊視察洪水橋輕鐵站同元朗西鐵站到底有幾逼。二少透露，原本大家冇諗住搭輕鐵，但覺得一場嚟到，不如搭埋試吓啦，邱武又肯一齊搭喎，結果大家喺洪水橋搭輕鐵去西鐵元朗站。
二少話，佢哋大概8點35分去到元朗站，足足等咗三班車先上到車。佢形容邱武都好似等到面燶燶咁，相信佢經過呢次親身體驗，先知道實際問題有幾咁嚴重。事實上，沿途亦有唔少市民投訴上唔到車。二少話，如果日後西鐵伸延至屯門碼頭，喺元朗同朗屏等站嘅逼爆問題會更嚴重，佢建議港鐵喺天水圍站加多啲吉車舒緩擠塞問題。