前主播鄭文同Soler嘅Dino兩個潮爆爹哋媽咪，最近幫港台主持節目《至潮爸媽手冊》，日前鄭文同囡囡Sabrine、Dino同囝囝Damiano齊齊喺觀塘接受訪問，兩個小朋友搶晒爹哋媽咪風頭，對住鏡頭一啲都唔怕醜，玩得好開心，Sabrine帶咗套玩具保齡球同Damiano玩，萌爆嘅Damiano真係好搞笑，唔知點解成日拎住個波掟鄭文，做咗標靶嘅鄭文笑話：「點解我今日好似得罪咗啲小朋友？」見到Damiano個樣咁可愛，又點會嬲呢？
計劃再生B
今次鄭文同Dino喺節目度會分享湊仔經，講到怪獸家長呢個話題，佢哋唔覺得自己有份，Dino話：「我只係想小朋友開心，所以好多嘢都會隨緣，唔會逼佢。」鄭文就話：「囡囡係一個有性格嘅人，用逼嘅方法唔得，反而我會同佢多啲溝通，希望佢有一個快樂嘅童年。」問佢哋有冇諗過再生B？Dino笑話：「我同太太入咗紙，𠵱家等佢揼印！」鄭文就話：「我老公恨咗好耐，但我反而想發展吓事業。」
撰文：馮仁昭