做議員嘅固然坐困立會，連班議員助理同司機，一樣被軟禁。八方聽聞，一班立法會議員司機，早前人人夾咗幾百蚊，自資買咗張乒乓同桌球兩用嘅枱，放喺大樓入面專畀議員司機休息嘅房入面，喺留守立法會、老細未召喚時打波解悶relax吓。據聞見到有張咁大嘅波枱後，立法會秘書處難免「溫馨提示」唔係咁好喎。
點知提示出咗冇耐，有司機噚日發現張枱俾人拆爛咗，有司機不滿秘書處玩嘢，報警求助。有司機同八方講，係立法會保安同事聽命上級而拆枱，但另有人話，係有司機從善如流拆咗點知拆爛咗，搞出一場風波。八方噚日就住呢壇羅生門，向立法會秘書處查詢，佢哋話休息室並唔係用嚟打波；拆爛枱呢件事就要了解吓先喎。