「米粉節」噚日開鑼，20分鐘內過億人仔已袋袋平安，網民除了搶紅米外，小米盒子都是目標，全球科網企業近月愛死了機頂盒，蘋果、亞馬遜已推出自家「盒子」，有傳Google都想分一杯羹，至於串流服務，眼見Netflix股價翻幾番的魅力，引來雅虎虎視眈眈，花旗國串流大戰進入白熱化階段，至於北望神州，強國科企們一啲都唔斯文，早已拳來腳往。
先講硬件，播放器大陸老品牌有杰科、海美迪，半途出家的更多，香港人熟悉名字有華為、創維（751）、TPLINK、小米等。第三方軟件應用程式更加是百家爭鳴，有優酷、搜狐、愛奇藝呢啲大陸一線視頻網站，仲有千千萬萬間土豆，當中值得一提是，獲得「星星」中國雙平台獨播的愛奇藝，憑着呢套劇，收到超過20億點擊率，破晒紀錄。
最新市場研究顯示，愛奇藝在強國無論電腦定移動視頻都保持全面第一的位置，優酷土豆只排第二。佢哋學埋Netflix咁推出自家劇集，憑着大班忠實粉絲群，左右逢源都冇投訴，舊年同TCL合作推互聯網電視之餘，亦能夠同創維、海信合作，近期仲話推出手機視頻神器，認真巴閉。愛奇藝都打算向外闖赴美上市，但最弊係愛奇藝出身在強國，老翻橫行，能否好似Netflix振翅高飛仍存在變數。
Samantha
本欄逢周一、三、五刊出