【第33屆香港電影金像獎頒獎禮之最佳綠葉】85年是陳友曾接近香港電影金像獎獎項的時候，當年他憑《緣份》獲提名最佳男配角，結局不消提。接近30年後，他憑《殭屍》的良心道士再獲提名男配，亦是前所未有接近獎座的一趟。自言久別銀幕20年、有獎好過沒獎的陳友，雖然身為內地電視台的CEO，但認為做演員有贏冇輸，好過做生意。
撰文：張俊銘
先說說歷史，85年第4屆香港電影金像獎首設配角獎項，陳友憑《緣份》獲提名最佳男配角，最終敗給《省港旗兵》的沈威，而同屆梅艷芳則憑《緣份》奪最佳女配角獎。同年一齣《殭屍先生》在港狂收2千萬票房，掀起殭屍熱潮，林正英與陳友在戲中飾演道士師兄弟，形象深入民心。今年憑《殭屍》再獲提名最佳男配角，陳友日前接受本報專訪時說：「對手部部都勁，《中國合伙人》拍得好好。」
欣賞Juno細心
陳友曾於七、八十年代專心搞電影創作，曾獲提名最佳導演，對於今次提名男配角，他說：「幾開心，攞到梗係好，攞唔到都咁好，有提名已經好好。」話雖如此，他已計劃與親朋慶祝：「梗係會同屋企人慶祝，仲有我班兄弟，最感謝劇組，拍到咁出息嘅電影。」他甚欣賞首執導筒的麥浚龍（Juno）：「佢係思想好成熟嘅年輕人，佢拍呢部戲時得28歲，但係佢諗嘢就似82歲，乜都俾佢諗到，思想細心，佢對人性揣摩好深入，係不可多得嘅導演。」
20年前，陳友與毛舜筠拍完電影《兩屋一妻》後，從此到內地發展，20年後再走到幕前遇上《殭屍》道士一角，他特別感恩：「我演呢部戲都係順住角色演，呢個道士都幾過癮。可能係我年紀有咗經歷，同我以前拍電影好唔一樣，睇番以前拍《一屋兩妻》，同𠵱家個人變咗好多。」陳友於戲中再披道士袍，原來演出大有分別：「其實好唔一樣，以前動作喜劇殭屍片，商業搞笑，冇咁多內心描述。今次顛覆好多以前嘅諗法，創意都唔一樣，多咗思想質量，多咗啲回味方法。」
好過做生意
相隔20年再演幕前，陳友感覺習慣又新鮮：「去到現場都係冇變，演員係好優待，張凳擔畀你先，飯你食先。」會否繼續接戲？陳友說：「我梗係鍾意做！拍戲做演員真係幾好，片酬唔少，唔會太辛苦。如果部戲好，行出嚟樣樣都係你，做演員絕對係有贏冇輸，做生意有贏有輸，好多嘢你控制唔到。」
戰況分析：張晉勢成攔路虎
音樂人出身的陳友，除了曾跟林正英合作經典電影《殭屍先生》扮道士外，他在《一屋兩妻》及《一妻兩夫》中飾演小男人，同樣令人印象深刻。今次事隔接近30年憑《殭屍》中的道士一角再次挑戰男配獎，陳友在戲中潦倒但霸氣不失的演繹方式，賽前已獲不少圈內人推崇備至，一般認為他今趟在沒得輸的情況之下，應該勝券在握。假如真的要在張晉、佟大為、黃渤及彭于晏四名候選男配中找對手，相信是《一代宗師》的張晉，戲中他將鋒芒畢露的馬三一角演得活靈活現，亦令他人氣急升。
撰文：何永寧
最佳男配角提名：
張 晉《一代宗師》
佟大為《中國合伙人》
黃 渤《西遊．降魔篇》
彭于晏《激戰》
陳 友《殭屍》
資料來源：香港電影金像獎協會
