中學DSE卷三聆聽能力考試部份內容討論一個領導的才與德，提及宋朝司馬光才德之說，指德優於才是君子，有才無德係小人，無才無德是蠢人，搵到聖人當然最好，否則搵蠢人好過起用小人，因為小人處高位，後果好嚴重，反之愚蠢者掌權，即使要作惡，也搞唔出乜嘢花樣，為害程度比唔上小人。好多人認為呢段德才論有現實影射意味，表面睇落有道理，當年特首選舉，好多人認為梁振英有才能，唐英年冇能力，加上失德，所以支持梁振英。即使當時大家都知道梁有野心，有自己政治算盤，也無所謂，至少專業人士認為佢有能力，所以稱為狼豬對決。
但兩年下來，細心諗多一諗，發覺傳統中國人所謂德才論，戇居笨實之至，儒家所謂君子小人，賢與不肖區分，根本就不合時宜，而且從未實現過。
首先，所謂德優於才，究竟乜嘢叫做德，字面解有修養德行，但正正德係可以假扮，當年王莽篡漢前，便扮晒叉燒禮賢下士，大造形象工程。德最大鑊係冇一套客觀標準，靠吹水互相吹捧。
梁振英當日正好效法王莽，落區扮謙恭，收編一批為民請命之人如何喜華之流為佢站台背書，一大套改革政綱吸引一班幼稚病知識分子，包裝到德才兼備。最重要係同《明報》夾檔，如果講失德，唐梁皆涉僭建，《明報》淨係爆唐英年大鑊，到梁當選大權在握後才揭出梁大宅有僭建。因此可見，憑道德形象去判斷是否適合當領導，中招機會好大。今日德之內容變成「愛國愛港」，又如何，一樣可以扮啫，你睇吓溫兆倫咪知！
儒家人才觀不合時宜
既然無德，咁至少有才啩？又錯晒，梁之領導才能有目共睹，不過係一個區議員拉banner成功爭取之民粹政客，「朝種樹晚𠝹板」，見市民嗌樓價貴，就求其將口號變政策，「港人港地」明知不可行，為求短期民望倉卒出台，一年後爛尾收場，其他如二手居屋白表免補地價、出售置安心，全部無成效。
今次泛民上海行又要搶曾鈺成功，死要飛上海出席，慌死蝕底，究竟乜嘢人嚟㗎，連王國興都冇咁盡。
坦白講，儒家一套人才論已經out晒，學生學咗就真係變蠢人。現代政治主權在民，無論聖人君子、小人蠢人，都有機會利用蠱惑手段，蒙蔽人心而上位，內地領導追看《House of Cards》電視片集，就係解剖西方民主政治險惡之處，但人民有權選擇，亦有權將作惡小人趕下台，呢樣先至係最重要。
廿一世紀，仍然有人相信以德作挑選特區領導標準，真係out到爆。
添馬男