噚日「米粉節」，通訊社報道小米網上預售百萬部手機，短短20鐘內定單過億，小米熱爆！幫小米生產手機電池嘅飛毛腿（1399），超級肥仔水，在小米幫中，仲大落後，超碼睇升70%。
除咗上邊新鮮熱辣米粉節，小米新鮮熱辣上季數據，出機1,100萬部，同比一支箭增加咗1.5倍，掌舵雷軍仲話，小米明年營收要衝擊千億銀。又家陣係全球前列嘅國產對手聯想（992），預期若順利收購摩托羅拉，本年度出貨量會倍增到1億部，而中興（763）亦預期今年會達到6,000萬部。國產手機受歡迎，keep住高產量。
Back to飛毛腿，集團喺2012年度狠撥傳統手機電池之後，上年為上邊小米、聯想及中興各路大哥大，生產智能手機電池，而啱公佈冇耐2013年度，就大幅虧轉盈3,830萬銀人仔（2012年度見紅1.9億銀）。國產手機產銷火紅火熱，飛毛腿今年繼續掂過碌蔗。
又上年10月〈一周兩件〉主打過通達（698），手執鐳射直接成形獨門技術，家陣飛毛腿同松下聯合研發「無接點充電」產品，一推出就「引起業界關注」，講技術一樣煞食。呢壇製作亦有機會為集團挖多桶金。
估值大落後小米幫
樂觀啲計，飛毛腿今年純利增長70%到6,500萬銀人仔，PE得10倍。又集團現價（0.81元）PB得0.57倍，小米幫通達（幫小米生產手機外殼），由上年10月到家陣翻咗一番，PB兩倍，信利（732）兩倍過外，電池股光宇（1043）1.1倍，飛毛腿平成截。又當其他小米幫，呢半年閒閒地倍幾兩倍升幅，飛毛腿上個月先識郁，落後到爆，博升70%到1.4元，PB先得1倍，啱先追到光宇，仲未追到其他小米幫。
錢雋
細價股專家
本欄逢周二、三、五刊出