和平佔中運動明明獲得主流民主派支持，白鴿黨仲有唔少人話明願意做死士，何解佢哋忽然轉軚反佔中？嗱，大家留意嘞，白鴿黨只係反對港鐵逼市民佔領金鐘站啫，此「鐘」不同彼「中」。話說白鴿黨南區團隊噚日朝早去咗行會請願，要求政府一氣呵成興建南港島綫西段，以便連接黃竹坑同香港大學站，藉此避免香港仔段落成後，南區地鐵西段嘅乘客，被迫集中晒喺金鐘站轉車，到時一定出現人頭湧湧佔「鐘」嘅情況。白鴿黨早前做調查，發現如果華富去中環或銅鑼灣，要喺金鐘站同黃竹坑站轉地鐵兩次，唔多受市民歡迎，50%受訪者話寧願搭巴士直達銅鑼灣或中環，得39%受訪者肯轉兩次地鐵。如果政府唔想市民佔「鐘」，睇怕都要做啲嘢咯。