蘇亞雷斯同史杜列治（SAS）有咩共通點？都係前鋒、踢緊利物浦、今季入好多波，同埋佢哋都有顆關懷弱小嘅善心。史杜列治星期一就特登去到利物浦市一間小學，𠱁小朋友開心。呢次行動都算幾鬼馬，搞到班小朋友好驚喜。每個小朋友會先喺鏡頭前講吓史杜列治，有啲仲即場跳起史杜列治慶祝入球嘅舞，而當小朋友跳到忘形時，史杜列治就會喺佢哋身後突然出現，先畀個驚喜佢哋，之後同佢哋傾偈、影相，同埋交流吓點樣跳得好佢嘅招牌慶祝動作。
史杜列治校園𠱁細路
可能有人話史杜列治呢啲係官方宣傳活動，佢當返工咁去，可能唔係真心，但蘇亞雷斯行過公園，會特登停低同小朋友踢波，就肯定唔係做騷。有位英國網民星期一帶佢患有唐氏綜合症嘅表弟去公園玩。蘇亞雷斯咁啱路過，阿蘇竟然停低落嚟，用佢嘅寶貴時間同網民嘅表弟踢波！
網民benjibean喺外國嘅利物浦論壇分享呢件事，佢話星期一同埋叔叔，帶埋7歲嘅表弟去公園。呢位網民仲帶咗個紅色利物浦足球去，畀表弟喺草地度踢。初頭蘇亞雷斯行過嚟拎個波嚟睇，網民嘅阿叔仲以為戴住黑超同黑帽嘅阿蘇係麻煩友，想嚟蝦細路；但阿蘇即刻表明身份。網上消息指，阿蘇係見到個利物浦足球，所以特登過嚟。阿蘇好親切，除咗教呢位患唐氏綜合症小朋友踢波外，仲影相合照。
阿蘇教智障小童踢波
Benjibean好感動咁話：「呢幅同利物浦史上其中一位最出色球員嘅合照，將會陪伴我表弟成長。我好多謝蘇亞雷斯。佢真係一個好人，雖然佢喺艾拉同伊雲洛域件事備受爭議，但我相信佢有顆善良嘅心。」雖然阿蘇喺球場內麻煩多多，但從未聽過佢場外有醜聞，冇打架，冇嫖妓，對老婆又一條心。
正所謂好心有好報，所以喺下周日利物浦對曼城嘅英超大戰中，賽會派咗卡頓保嚟執法。卡頓保做球證對利物浦有咩好處？之前紅軍作客大勝曼聯3:0嗰場就係卡頓保吹嘅，佢仲一場畀咗3個12碼利物浦，咁大家明白啦。