當特首辦早前公佈狼振英任內20個月外訪開支，自揭狼英搞嘅內交花費好低甚至乎係零，因此得意洋洋之際，內地唔少評論員同網民卻因此好㷫，事關特區政府零開支啫，唔等於冇使費。唔少人話，明顯係內地省市領導慷強國人之慨，用公帑埋單啦，大鬧狼英吃免費午餐嘅評論喺網上瘋傳，有人仲叫內地檢討呢啲「好客」文化，似乎唔太歡迎用公帑接待狼英。
事緣特首辦早前話喎，狼英上任20個月內嘅21次外訪開支，喺舊年3月出席深圳希瑪林順潮眼科醫院開業典禮，以及今年2月會見廣東省領導，兩次開支都係0；而幾次去廣、深，花費都係約1,000蚊。最貴嘅外訪係舊年6月帶咗幾個人去美國紐約出席香港貿發局嘅招商活動，人均花費超過10萬。
「忙忙碌碌卻碌碌無為」
八方發現，經《南方都市報》報道有關消息後，網上旋即出現唔少矛頭直指狼英白吃白喝嘅評論。《中國青年報》就登過「肖華」嘅評論文章，題為〈香港特首外訪 待遇天差地別〉，借解釋點解狼英內交同外訪嘅分別，提醒內地省市請客時，費用要透明，舉例指美國政府唔得納稅人同意，啲官唔可以花費請別國官員囉。
另一篇由郭元鵬撰寫嘅文章更喺內地不同網站熱傳。文中拆解狼英訪問內地點解冇支出？肯定因為內地「熱情好客的傳統」，繼而大鬧呢啲熱情傳統係浪費納稅人嘅金錢，仲寸寸槓講一句狼英上任後不停出訪，「忙忙碌碌卻終究是碌碌無為，這也值得感嘆」。
連《意大利新華時報》都刊登過題為〈梁振英免費大餐 內地納稅人給埋單〉嘅評論文章，話正正因為內地咁慷慨，搞到狼英內交越來越多，仲話由此見到特區政府好「小器」，見人哋肯使錢就一個仙都唔出。乜叫醜事傳千里？八方相信內交王一定話之佢。
mailto:[email protected]