估唔到文憑試連「必要的沉默」呢類咁具惡搞潛力嘅嘢，都可以拎得出嚟做作文題目；噚日網上亦流傳一份「香城宣傳及洗腦局2013年香城中學文憑考試」嘅試卷（圖），其中一條試題引述咗一啲報道，話《香城日報》講愛護香城力量搞咗個挺梁遊行，支持梁英秀施政，愛字頭發言人陳一心話，梁英秀上場後改善民生，成績有目共睹咁話。試題叫考生以陳一心身份，撰寫一篇宣傳講稿，呼籲市民站出來挺梁。呢份試題雖然係惡搞，但惡搞得來又好寫實喎，反而真實嘅試題，就令人感覺陌生。實在令喺考場內嘅考生分唔清，面前嘅試題，究竟係一份真正嘅試卷，定係一份惡搞作品。又或者，公開考試，根本就係對考生嘅一種惡搞。