上年10月15日，仲係「一周兩件」嗰陣時，主打華夏醫療（8143），喺升咗70%之後（0.38元），在今年1月14日，好嘢再推多次，家陣累積大升咗兩倍！而華夏個仔萬嘉集團（401），就未郁過，轉戰萬嘉博大爆邊！
上年10月11日，華夏以分派形式，將萬嘉分拆主板上市，萬嘉現價（0.76元）相對上市日最高位，亦係暫時最高位1.25元，潛水40%。萬嘉呢個超殘價，預測PE得11倍，PB更只得0.47倍。以呢個PE同PB計算，幾乎橫掃晒，場內至抵搞，當炒基本面，已經有權要大追落後。
萬嘉係福建省藥、保連鎖店大哥大，透過「惠好四海」，喺六個地級市經營上百間零售店。而集團分銷包括上千種中成藥、7,900種西藥，1,200種醫療用品。萬嘉有咁好嘅品牌同分銷基礎，進軍醫保電子商貿，又得唔得？
又剛啱上年尾，萬嘉公佈話同北京萬通立體之城簽訂諒解備忘錄，喺北京萬通位於西安西咸立體城項目，睇吓有冇合作空間。據介紹，西咸立體城除咗打造500萬平方米醫療產業，企業掌舵馮侖，仲希望通過立體城，將醫療產業輻射到成個西北1億幾高端人口。亦講過，祖國醫網購，2012年大飆咗4倍，到17億銀人仔。
PB落後同業 睇1.4元
一個醫藥電貿，一個立體城，潛力勁爆炸。嚟緊日子，萬嘉只要其中一瓣去馬，股價肯定刺激十足，而阿媽華夏，先真正享受到分拆嘅增值好處。
又萬嘉街貨得2.36億股，或36.4%，等值1.77億銀咁大把！集團上市以嚟，長企呢個殘價浮沉，乾晒。博翻一番到1.4元，萬嘉PB仲未到1倍，未有耐追到同期上市嘅新銳醫療（8180），家陣上3倍PB水位。
錢雋
細價股專家
本欄逢周二、三、五刊出