香港十五歲學童參加OECD嘅數碼知識（Digital Literacy）測試，結果係星加坡第一，南韓第二，日本第三，香港第四，基本上與PISA嘅閱讀、科學、數學測試結果相同。香港啲初中三年級學生好嘢吖，位居世界第四，點睇都係世界頂尖水平，但香港永遠有「妄自菲薄派」，指香港學生遠遜星韓，好似好唔掂咁。駛乜咁緊張呀，美國15歲學生之PISA測驗結果，從來低於東北亞及星加坡學生，但拿加州矽谷與亞洲相比，邊度最有創意先？邊處係世界新科技發源地先？星加坡初中三年級咁叻，大個之後又唔見星加坡嘅科技工業水平高過以色列？以此觀之，啲大人何須為香港初中生輸俾星韓日而介懷。
公共交通又係如此，香港報章評論，一般市民最鍾意大罵本港地鐵服務，交通費貴呀等等，殊不知在世界大都會之中，香港嘅交通費已經算係便宜，而且四通八達，方便快捷。唔信呀？世界上歷史最老嘅顧問公司Arthur D. Little（即係僱用Snowden仁兄嗰間公司），得到國際公共運輸協會（UITP）嘅支持，在全世界84個大城市研究「運輸生態」，就指香港係地球上最好嘅，其次係斯德哥爾摩、阿姆斯特丹、維也納與及倫敦，整個研究涵蓋各種交通工具，包括私家車、火車、巴士、小巴、的士、電車及小輪。長達64頁嘅報告更指香港嘅交通生態（eco-system）幾乎無懈可擊，只係需要增加單車徑網路及改善空氣質素，又話香港港鐵將人口高密度由威脅轉化成為機會。
香港人夠飄飄然未？唔會嘅，立法會議員最鍾意鬧地鐵，鬧九巴，唔鬧唔安樂嘅啦，在公共交通方面，借用李嘉誠一句金句，香港人像是被寵壞了的孩子，大家試吓到外國大城市，就知道乘搭公共交通工具之難。倫敦與紐約嘅地鐵水平當然不如香港，東京大阪地鐵系統好好，但價錢貴過香港地鐵而同樣擠逼，到洛杉磯，冇私家車就好似跛咗腳，教人如何不想香港，可以從柴灣坐地鐵駁西鐵接輕鐵去到元朗買老婆餅。