48歲嘅羅霖，最近因為喺才子陶傑處男執導電影嘅《愛．尋．迷》中，以不倒胸肉搏30歲嘅關楚耀，成為全港焦點。一向好like睇戲嘅財爺鬍鬚曾，原來唔單止鍾情於法國電影㗎，對港產片佢都好支持喎。
陶傑邀請睇優先場
鬍鬚曾噚晚都去咗圓方THE GRAND CINEMA捧場，唔通佢都被羅霖同關楚耀呢幕城中熱話吸引？財爺身邊人就解釋，鬍鬚曾主要係應陶傑邀請而入場唧。
哦！八方仲聽聞，原來才子為宣傳佢嘅處男作，廣邀各界好友睇片，本來請鬍鬚曾星期三（9號）睇首映㗎，但撞正鬍鬚曾當日要去立法會就預算案辯論發言，諗落似乎又唔多適合朝早啱啱先講完budget、夜晚就去睇情慾戲嘅，可能佢費事俾人笑佢係「AV曾」啦，所以呢，鬍鬚曾最後都係應承咗才子，喺噚日出席優先場，先睹為快咁話。