【第33屆香港電影金像獎頒獎禮之新晉導演】撫心自問，一向對香港電影金像獎新晉導演提名的積極性不大，不過今年的觀感大有不同。原因並非三位候選導演的電影《狂舞派》、《殭屍》及《風暴》總票房超過半億，而是在商業製作考量中，居然不失新人應有的青澀衝勁，令人看得非常過癮，影圈就是要有這股天馬行空的動力，當中麥浚龍（Juno）希望影壇能百花齊放。
撰文：盧妹
麥浚龍憑電影《殭屍》走過光影大地，參與多個國際影展後，終於回到自己地頭爭獎。他將首次以導演身份踏足香港電影金像獎的紅地毯，令他意外又鼓舞。《殭屍》講的是被遺忘的感覺，Juno找來平均年齡逾50歲的老戲骨演出，喜獲最佳女主角、最佳男配角、最佳女配角及新晉導演等9項提名。首執導筒的Juno日前接受本報專訪時說：「電影帶住自己去好多唔同地方，拎到9項提名好意外！」
望百花齊放
Juno憑《殭屍》角逐新晉導演，對手是《狂舞派》的黃修平及《風暴》的袁錦麟，問到信心？Juno說：「我未睇晒三部戲，唔可以答有冇信心，會盡量淡然，唔同頒獎禮有唔同機制，百花齊放係好現象。」他表示《殭屍》帶他行過很多影展，當中以東京電影節最深刻：「條紅地毯好似半個馬場咁長，又凍，我行完病咗！」他自爆由歌手轉做導演，又拍殭屍這個冷門題材，或多或少令人懷疑：「我哋打破咗好多慣例，演員平均年齡50歲以上，如果有人瑞獎，我哋一定攞到！」
若成功獲頒新晉導演，有甚麼新目標？Juno說：「攞唔攞我都會繼續拍，不過就算攞咗都唔會拍續集，我唔想因為《殭屍》意外成功而影響我思考另外嘅題材，其實我抗拒再拍鬼片！我想做監製，希望今年為手頭上嘅劇本做前期，下年可以拍，搞笑片我都唔排除，雖然我個人唔搞笑。」
化妝：Khaki Yan
《狂舞派》黃修平：唔會歸功好彩
小成本製作《狂舞派》曾被認定難拍易出事，不過最後贏盡口碑，導演黃修平更入選新晉導演。他日前接受訪問時說：「都有信心嘅，知道各方評價。當時我哋好似區議員咁拉票宣傳，係大家努力嘅成果。」他坦言今次是沒有artiste參與的獨立電影，曾說若有500萬票房就請食龍蝦，所以還欠大家一餐。
講到票房不錯，黃修平說：「唔會話因為當時冇本土題材嘅電影而妄自菲薄，亦唔會歸功好彩，我認為係一件好嘢，配合天時地利人和。」心情緊張？他說：「冇乜特別心情，呢個唔係努力就一定可以贏嘅比賽，我都係平常心，如果畀我，我都好樂意接受。」
撰文：藍文浩
場地：The ONE
《風暴》袁錦麟：冇諗過搞到咁大
曾為多套電影擔任編劇的袁錦麟，憑電影《風暴》獲提名新晉導演，日前他接受本報專訪時，坦言看過黃修平的《狂舞派》，很欣賞對方拍攝出來的態度，不過他一再強調沒去多想獲獎機會：「我由寫劇本到開拍，都唔係為咗攞獎，所以攞唔攞到獎都好，都係一種鼓勵。」
談到金像獎的意義，袁錦麟說：「係一個根，獲得自己根源地一個頒獎禮嘅提名係一個肯定、鼓勵。」憶述拍攝《風暴》時，他笑言整個計劃忽然越搞越大：「拎劇本畀老闆江生睇嗰時，都冇諗過搞到咁大，好多諗法都係忽然加落去，都有少少壓力。」
撰文：文國駿
新晉導演提名：
黃修平《狂舞派》
袁錦麟《風暴》
麥浚龍《殭屍》
資料來源：香港電影金像獎協會
