自從95年起，英超冠軍唔係嚟自倫敦，就喺曼徹斯特，就算好多季爭奪過程好激烈，但嚟嚟去去都係嗰幾隊，球迷都睇到有啲悶；好彩今季都有新挑戰者，就係默西塞德郡雙雄，「紅軍」利物浦周日9連勝，作客擊敗韋斯咸後，爭標形勢唔錯，同市嘅「拖肥糖」愛華頓同日亦炒阿仙奴3球，取得聯賽6連勝，有機會殺上前4，爭歐聯席位，默郡真係威威囉！
謝拉特總入球壓國王
嚟到今季最後第6輪聯賽，紅軍距離球會首個英超冠軍越嚟越近，球員話冇壓力都係假；周日作客韋斯咸，前鋒蘇亞雷斯同史杜列治都冇晒之前幾場話入就入嘅射手本色，好彩「神奇隊長」謝拉特坐鎮，上、下半場各射入12碼，抵消「槌仔幫」後衞迪美嘅問題入球，以2:1小勝，取得9連勝。謝拉特叫得做紅軍精神領袖，抗壓能力梗係強，今季除咗對曼聯宴客之外，已經射入10個12碼，謝四更累積173個入球，壓過「國王」杜格利殊升上球隊總入球榜第6位。
紅軍以74分升返上榜首，領先主要對手曼城4分但多踢兩場，周六主場對冠軍賠率大熱嘅曼城，就幾乎決定冠軍誰屬，謝四賽前就話：「下場係一個重要比賽，我哋要保持鎮定。但就算己隊贏波，都唔代表冠軍已經在手，畢竟仲有4場比賽要應付。」紅軍領隊羅渣士就話，以兩軍嘅班費，壓力係曼城身上，利物浦會以享受嘅心情應戰。英國博彩公司威廉希爾已經開咗利曼戰盤口，利物浦主W2.4倍，曼城客W2.8倍。
雲格怨外借制度不公
默西塞德郡另一支球隊愛華頓亦都勇猛非常，周日主場大炒阿仙奴3蛋，聯賽6連勝，只落後阿仙奴1分兼少打1場，大有機會自05年後再取前4。阿仙奴領隊雲格又輸大大鑊，今季作客前5球隊全輸兼失20球，雲格冇反省不特止，仲話外借制度唔公平，車路士點可能借盧卡古等球員畀愛華頓。
阿仙奴固然爭前4出現危機，𠵱家應該要集中精神，應付周六英足盃4強對英冠韋根嘅賽事。
