永隆、永亨（302）、恒生（011）呢批本港銀行早於三十年代成立，已經屬於老字號，原來有間廣東銀行早於1912年創立，中國一代華資銀行家宋子文亦曾擔任董事長，經過多次易手後，變成今時今日嘅建設銀行（亞洲）。
建行（亞洲）由廣東銀行變成今日嘅中資港銀，前後超過百年，1912年由三藩市華僑李煜當與陸蓬山創立，陸氏係首任主席，總行喺德輔道中6號，建行（亞洲）今日仲用緊呢個行址。建行（亞洲）最近舉行百年展覽，展期至本月底，細數由廣東銀行，去到1984年被收購成為太平洋銀行，至1993年再重組成為美銀（亞洲），至2006年被國有銀行建行（939）收購成為建行（亞洲）。最近提購永亨嘅華僑銀行CEO錢乃驥就做過美銀（亞洲）CEO。
展品好有歷史價值，例如一份有宋子文簽名嘅董事會會議紀錄，就由1936年保存至今。部份展品反映當時嘅經濟同交易環境，其中一份咖啡商向廣東銀行開嘅有抵押貸款借據，年份不詳，但就紀錄低當年一間咖啡商放低咖啡豆喺廣東銀行做抵押品。
