【灣仔→尖沙嘴】因貌似謝霆鋒而被稱為「佛門霆鋒」嘅內地和尚釋道心，打扮新潮仲曾經出過碟嘅佢，早前被高登仔惡搞填詞，整咗隻叫《罪與佛》嘅《佛教流行曲概念大碟》，沉寂咗一排，上星期佛門霆鋒嚟咗香港，身為出家人嘅佢一啲都唔避忌咁同位女士出雙入對。
海旁睇風景
上星期三下晝1點幾，佛門霆鋒同女友人離開灣仔一間酒店，睇嚟佢哋經常嚟香港，好熟路咁落咗港鐵站，仲自備八達通搭車。佢哋過咗尖沙嘴後打咗個電話，大概10分鐘左右就有位女性接佢哋上海港城一間辦公室，逗留個幾鐘後，佛門霆鋒落樓同女友人留喺內地人好鍾意去買嘢嘅海港城行街。
佛門霆鋒陪女友人去眼鏡店睇Ray Ban太陽眼鏡，但佢自己就似乎冇乜興趣。之後轉咗去睇名牌RIMOWA旅行篋，呢樣就吸引到佛門霆鋒注意，佢仔細咁問咗售貨員好耐，不過最後都係冇幫襯。跟住就好似好多內地遊客一樣，去咗海港城對開嘅海旁，不停玩自拍同互拍，影夠相後就好熟路行去天星碼頭搭船過咗中環ifc行街，再坐港鐵去銅鑼灣嘅許留山，嘆咗碗西米露，之後兩人就好心滿意足搭的士返酒店。
採訪、攝影：羅德光、黃曉程
