每次行入美容院，特別係連鎖式經營嗰隻，都一定要懷有金剛不壞之身（最好係聾啞）。任憑美容師踩到你啲皮膚似月球表面，鞋過沙紙，都唔可以一時心軟放低張信用卡，買咗一打半打美容套票。有美容業界朋友同菲菲講，行內有害群之馬幫人做facial時，表面話免費送多個mask畀人，但實際只係搽少少水上個客塊面度。
家用美容儀器日漸普及
查實近年市面有家用美容儀器，至於家電品牌Hitachi出品嗰部「導出導入」機同Clarisonic洗面機，更被網上絲打捧為「護膚神器」，用完連美容院都唔使去。恕在下不才，實在搵唔到前者銷量幾多，只知部機經「水貨佬」帶紅後，逼到官方出埋「行貨」。
至於後者係L'Oréal旗下，連Lady Gaga都有用。L'Oréal於去年度業績就提到Clarisonic錄得非常強勁增長，去年進軍亞洲後銷情理想，全年銷售增長35.9%。實際數字就冇公佈，但睇番2010年銷售額都有7.8億元，今時今日條數double都唔奇。
所以與其行入美容院俾人劏，畀錢買啲成效未明嘅嘢，不如上網做下功課，買啲有口碑嘅產品番屋企自己用好過。記住女人就算要花錢，都一定要使得精明，否則買錯嘢後悔就喊都無謂。
Fifi
本欄逢周二、四刊出