香港689同台灣689始終有4個零嘅分別，所以馬總統約反服貿學生見面可以「無格直出」、赤裸大公開，梁特首約港大學生會（HKUSU）食餐飯，都要閂埋門閃閃縮縮，難怪啲同學仔睬佢都儍，反客為主建議梁振英去港大論壇，公開傾政改同增加資助課程嘅安排。聽港大學生會會長梁麗幗講，早排想請特首嚟上周五嘅就職典禮，特首辦禮拜四上晝覆返佢話嚟唔到，但反請一班幹事今個月22號一齊食晏。幹事會話晒都係民選出嚟，點會咁易做小紅帽上當吖，梁麗幗話，同學一聽到聚餐係閉門，唔畀傳媒採訪，即刻耍手擰頭，改約特首嚟港大論壇。