哇！昏睡多年嘅良心電視台ATV，嚟緊5月有大革新喇！做咗執行董事嘅葉家寶噚日第一次以此身份開記招，好高調咁宣佈5月會將黃金時段播緊嘅外購劇，由9點提早到7點半播，搵幾個主持坐喺度齋talk嘅時政節目就調去9點半開始播，仲話會開始製作節目畀婦女同長者睇，新聞部會製作《紅色革命》、端午節會直擊龍舟喎，唔知係咪重播廿年前嘅龍舟賽呢？
葉家寶：重播率不算嚴重
對於亞視被批評不停重播節目，浪費大氣電波，葉家寶公佈咗亞視自己做嘅調查，收集咗香港、內地、日本同新加坡7間電視台共9個頻道嘅數據，話呢啲電視台嘅重播率由兩成至六成不等，亞視只係三成幾，唔算嚴重喎。
佢仲大條道理咁話，無綫同亞視都有重播，兩個台嘅分別係，無綫重播以前拍落嘅舊劇集同綜藝節目，亞視就重播即日時事資訊節目……八方聽到O晒嘴。講到亞視收益方面，葉家寶就承認廣告不多，收支不平衡，但近兩個月廣告有增長，希望兩年內達收支平衡喎。