幾年前有位在本地大學執教的舊同學邀請我擔任甚麼「師友計劃」（Mentorship Program）的導師（Mentor），通常情況我都敬謝不敏，為怕自己憤世嫉俗的思想會誤人子弟，免得他日其父母會追究責任。況且我公司亦不乏年輕同事，要掌握社會的青春脈搏，其實不假外求。然始終是老同學，盛情難卻，惟有勉力而為。
就這樣多了幾位青年朋友，難得畢業後仍會主動安排飯局招呼我這位「老餅」。昨日勤力讀書，今日努力工作，橫睇掂睇，大好青年。「工作如何？」我聊表關心的問。「有返工冇放工」、「有OT冇OT pay」、「有表現，但話冇『筆直』所以冇B仔（Bonus）」……
即轉話題：「平日放工有乜節目？」「收工天都黑晒啦」、「逼到車返屋企都眼瞓啦」、「放假成條街都逼滿人同篋」、「去郊外都係聽普通話，仲話要發展郊野！」本來仲想叫佢哋同我一齊行山，就此打住。
咁有冇啲開心少少嘅嘢？話晒大好青春，「有冇拍下拖呢……」我裝不經意問。「食茶記再睇套戲都成幾百蚊」、「有得拍拖都冇屋做嫁妝啦」、「邊度搵女仔肯同我捱麥記呢」（潮文威力果然厲害），「公屋仔見家長冇雞髀食呀」那刻諗起盧宛茵，差點笑了出來，罪過。忽又記起我寫過那篇《公屋廢青》招來洶湧群情，教我對「圍剿」二字有更深入了解。說不定其中的鍵盤戰士就坐在我面前，開始滴汗，「除咗雞髀，睇吓大家想食啲乜」圖借爛gag脫身……
當日惹火文章的回應，除了粗言，出現最多的詞彙是「離地」。我們這一代人，在年輕人眼中，非常離地。
十年廿年前，讀書為有黃金屋；為要顏如玉；為要成就四仔，且係當年有為青年的 「核心價值」！今日呢？上咗岸的上一代香港人，忙着指控新一代「怕辛苦，唔願捱」、「邊有人一出嚟做嘢就買到樓」、 「大學生唔願做博公屋」其實我都有份責難，總之「一代不如一代」咁話。實情呢？
今日年輕人生活質素倒退
經濟增幅（以GDP計）與工資增幅存在相當大的落差。根據報道，過去9年，香港人均GDP上升了54%，但整體工資升幅不過是36%；如撇除通脹因素，工資實際只得小於7%的增幅。而受惠的亦只金融及零售行業，其他大部份行業的薪酬待遇，不是倒退就是原地踏步。更糟糕的是，資產升值的幅度，以私人樓宇計，其間上升超過223%，遠遠拋離市民的負擔能力。
而香港亦連續四年當選全球最難置業的城市，繼續是全球樓價最難負擔的地方。樓價中位數是家庭年入息中位數的14.9倍，為新加坡指數的近3倍，相比第二位溫哥華的10.3 倍，自要多得近年湧入的強國人，仍是遙遙領先。
李首富曾語重心長地教訓：香港年輕人不應埋怨未能置業，因為「西方國家不少年輕人無物業亦很平常」。香港人，全世界供樓最難，全球住得最細最逼，李先生，真的很平常嗎？
上一代香港人走過那條平常路，對下一代而言，是舊路、同路、還是未見盡頭的不歸路、死路？說實話，我這所謂「導師」亦未敢奢言教路，心念及此，猶覺隻腳好似掂番地，或許就是那自以為是的「過來人」心態，直教我們對不知去向的青年有欠體恤和諒解，而今日他們面對的窘局，難道我們真的完全置身事外？
盧先亞