王維基旗下嘅香港電視開台遙遙無期，佢哋簽落咗一班幕前幕後精英面臨失業，好似唐寧咁笑話要做茶餐廳洗廁所。喺呢個徬徨時期，突然出現咗曙光，因為寰亞公司會新增電視製作部，每年會製作200小時劇集，主攻內地同海外市場，一年要製作咁多個鐘劇集，當然幕後都需要人手啦！老闆林建岳已經請咗前任無綫製作部戲劇製作總監梁家樹，電視製作部會由佢揸弗，頭炮係愛情浪漫喜劇，搵緊內地藝人孫儷同馮紹峰演。
啱用就請
梁家樹呢個月初已經正式上任，𠵱家埋緊班，噚日馮仁昭打電話問佢做乜嘢唔退休享清福，又要佢做開荒牛，佢笑笑口話：「我鍾意接受新挑戰，不過重新入到一間新公司，每年要製作成200小時嘅劇集，壓力係幾大，乜嘢都好似要從頭做過，人手係一個棘手問題，咁香港電視嘅藝人同製作人，如果啱用，我都會請，不過我哋製作嘅劇以攻內地市場為主，主要演員一定優先考慮內地熟識嘅人。」
撰文：馮仁昭