獅子銀行嗰位高大靚仔前高層馬凱博（Mark McCombe）喺2011年離開，跳槽到貝萊德之後步步高陞。貝萊德噚日公佈高層大執位，睇開機構客戶業務嘅Rob Goldstein升任營運總裁，現任亞太區主席嘅馬凱博將接手睇呢個部門，並於年底派駐紐約。
馬凱博接受訪問時話，雖然對本港同亞太區市場，一向感情深厚，但今次獲委任新職係個人好大榮譽；佢出掌嘅部門係推動集團未來增長嘅重要引擎，佢日後會專注環球機構投資者業務。
亞洲區係財富高速增長市場，佢年底開始駐守紐約之後，仍然會經常返港，跟區內投資者保持密切聯絡。
佢強調，今次調動絕非貝萊德減低對亞太區市場嘅重視程度，集團主席芬克上周先至來港，與政府官員、監管當局同埋商界領袖會晤，公司仍會繼續積極參與區內市場發展。