奢侈品牌PRADA（1913）上周派全年成績表，新興市場消費增長放慢和打貪等因素下，純利原地踏步是意料中事，正當市場大呼奢侈品牌行到盡頭之際，Samantha要讚下PRADA反應快，他們打算未來三年開50間獨立男裝分店，對現時只有30間男裝店的PRADA來說，認真揼本，但使得合理，因為當閣下巡一巡本港多個潮場，就發現男裝勢力正迅速擴張。
男士對外表越加重視已不是新鮮事，櫥窗前透過反光執靚自己不乏男生身影，有啲𡃁仔已經學埋韓國仔畫埋眼線。最殘酷是Samantha發現自己一身行頭，已經被身邊男性朋友所蓋過，呢班男人識搵錢，更捨得喺自己外表上使錢，醒目的不只是PRADA，Coach（6388）亦靠男裝發圍，希望三年內銷售額到10億美金，Michael Kors都話有信心男裝的營業額達10億美金。
有外國調查指，男裝近年複合增長率達7%，較女裝4%為高，而男裝貢獻品牌盈利達四成，未來佔比仲有得加。亞洲家陣大吹韓風，港男時興好似韓劇男神咁做乜都要有件西裝褸，外國就由休閒行返轉頭，後生仔女個個都鍾意度身訂做，執到成個紳士look見人，就算平時着衫幾隨意，請你望一望佢哋個袋或者對鞋，個牌子可能令你跌眼鏡。男人貪靚的一大片藍海，有冇錢景只建基於肯唔肯把握！
Samantha
本欄逢周一、三、五刊出