今屆美國大學男籃（NCAA）真係由頭爆到落尾，上周六上演嘅Final Four，冷風繼續吹，兩隊種籽排名較高嘅隊伍都喺準決賽輸波出局，亦造就美國時間周一晚，喺AT&T球場上演康乃狄格對肯塔基呢個低種籽排名嘅總決賽戲碼。
AI撐康乃狄格
4強頭場，康乃狄格面對經驗豐富嘅佛羅里達，竟然以63:53輕鬆贏波，斷咗對手嘅30連勝。之前康乃狄格一路俾人笑係一人球隊，淨係靠尼比亞孭起隊波。不過今場迪安祖丹尼斯挺身而出，個人獨得20分及10個籃板，而教練奧利賽後亦大讚佢嘅表現。
康乃狄格教練係以前打過NBA 76人等球隊嘅控衞奧利。睇見老隊友退役後做教練，艾華遜（AI）就喺instagram恭賀老友，仲話因為佢而支持康乃狄格贏冠軍㖭。人哋有戰神支持，但另一支決賽隊伍肯塔基班球員就冇咁開心喇。佢哋嘅大師兄，效力緊巫師嘅禾爾之前竟然唔畀面，睇死班師弟，預測佢哋第3圈輸波出局。就咁睇，似乎康乃狄格心理上先贏一仗。
肯塔基絕殺威斯康辛
不過佢哋決賽嘅對手都唔易啃，肯塔基有新鮮人艾朗夏里遜，繼8強以3分絕殺密茲根，今場對住威斯康辛再做救世主：當時落後緊71:73，佢喺完場前5.7秒射入一個3分波，最終幫球隊以74:73反勝。
綽號Huskies（愛斯基摩犬）嘅康乃狄格，同埋外號Wildcats（野貓）嘅肯塔基，兩隊上季都打唔入NCAA，但今年齊齊打入總決賽，將會上演一場貓狗大戰。睇番紀錄，肯塔基總共贏過8次總冠軍，比起史上只係贏過3次嘅康乃狄格，好似有些少優勢。但佢哋今季起用青春班，實在唔可以同兩年前嘅奪冠班底相提並論。
單睇決賽往績似乎對康乃狄格有利，佢哋3次入到決賽，全部贏晒，其中2011年嘅冠軍之路仲喺4強贏咗肯塔基。不過，可能見佢哋個勢勁，澳彩暫時開出肯塔基讓2.5分嘅盤路，贏波嘅呼聲好似高少少。
