好打得嘅政務司司長林鄭月娥，噚日出席扶貧委員會搞嘅千人齊做瑜伽活動，笑笑口話「我近來壓力都好大，可能都係時候加入大家嘅行列，學做瑜伽」。不過林鄭明明話想做瑜伽，而著名瑜伽導師黃佩霞仲企喺佢後面諗住教佢，但林鄭留咗唔夠半個鐘，做咗個雙手合十手勢，影完相就走人。Well，呢啲可能係壓力太大嘅病徵。
呢單瑜伽活動目的係提高社會對思覺失調患者嘅關注，係扶貧委員會「築福香港」扶貧活動之一，但單嘢全無扶貧味，反而中產味極濃，舉辦地點係每年學費近四萬元嘅拔萃男書院，參加者唔少都身光頸靚，驟眼睇以為去咗周日中產嘅聚會㖭。