呢期MK-Pop搗亂樂壇，其中一隊內地男子騎呢組合拾音社，喺愚人節將新膠歌《菲士》MV擺上YouTube，短短幾日已有近2萬點擊，當然唔少得高登仔捧場啦，有網友開帖話呢首歌係拾音社對於被恥笑嘅控訴，睇吓歌詞：「隨便笑，隨便吧，隨便叫，隨他吧，獨自站上台扮着障礙，靜待着你為我喝采。」又真係幾自強不息喎。
造型浮誇被插
拾音社喺MV嘅造型浮誇到爆，件衫三尖八角兼五顏六色，肩膊位好似加咗裝甲咁，兩位成員何柏誠同李滔跳舞又hea到震，後面三位dancers跳得仲好過佢哋，最弊有網友質疑首歌抄襲日本電子組合Perfume《Nee》，難怪好多網友都冇面畀，留言嘲笑：「仲未知醜？」、「隻舞簡直令首歌膠味生色不少！」、「請收皮」。
不過，曹操都有知心友，所以拾音社都有知音人，有網友就讚佢哋：「老實說，隻歌真係唔錯，不過啲造型唔襯and隻舞唔掂！」網友仲話三隊MK-Pop：天堂鳥、Faith、拾音社，最睇好拾音社：「呢兩隻嘢其實唔算靚仔，打扮都膠又想扮韓流，但總好過油黑眼線就以為好型嘅天堂鳥！」
撰文：馮仁昭
