上兩期，筆者寫得不太清楚，或令編輯誤會，以令其在配圖時寫上QE後技術分析開始失效，但其實我想說的，只是「傳統」技術分析不合時宜，因為我絕對係技術分析的信徒，甚至乎我認為其應用遠不止於股市，只要有足夠的交易量，樓市也可用其作參考。
我曾經運用技術分析，在電視節目中預測樓市會升三成，唔怕醜咁講三做三中，頭兩次升幅都講明是三成，結果遇到障礙不多，順利達標（以槓桿計，三成升幅是本金的一倍升幅了），最後這次本來走勢上應有多於三成升幅，可是突然推出辣招，樓價停滯不前，最後只升了一成半，系統出現沽出訊號（圖一），趕及在此次跌勢加劇前離場，共打了三場重要大仗。
隔山買美樓手續多
當然，以目前香港樓市，唔再適合投資者，惟有向外發展。美國係全世界最大經濟體，當然係馬首是瞻；圖二係美國Case-Shiller十大城市指數的技術分析圖，圖上有好多個準備止賺位，不過其實只在2006及2010年跌穿過，可以見到，2006年美國樓市從圖中P位跌到K位，穿止賺後離場，完全避過P-K的這幾年，所以我的系統在美國樓市，也有參考作用。
至於現時，走勢圖顯示美國樓市仍是在泡沫當中，如果未來唔跌穿止賺，美國樓還是可以諗的。
如果閣下有買美國房地產的經驗，應該體會到，當中手續比香港繁瑣，買樓要交房地產稅、增值稅及FIRPTA（外國投資物業稅）；其中，房地產稅每年0.3%至3%之間，聯邦增值稅15%，而FIRPTA又10%，如果搵管理公司幫手放租，服務費又要租金的一成，七除八扣，都唔係少錢。
更甚者，我有個朋友，去美國買樓，見到屋前有塊地，個花園好靚，但細心睇張圖則，才發現塊地原來唔係屬於佢，而係俾其他人買咗少少：如果之後翻起舊賬，個花園分分鐘就冇晒，同埋間屋係會冇路入去。所以，隔山買牛絕對唔容易，係力不到不為財。
咁點算呢？你可以買美國REITs的ETF，或其他替代品，但都係隔山買牛。我可以提供一個非常另類的選擇，一件本地貨卻與美國樓價走勢相似——創科（669）。
大家可以睇睇圖三，創科股價和美國樓市的走勢都算相似，創科係有點領先，可以見到圖三A位，創科係早一年跌；而在B位，佢又早少少升；去到C位，就完全出現背馳，Case-Shiller跌穿前低位而創科冇跌穿，之後仲升到破近年新高，走勢係優於Case-Shiller。
創科具領先作用
還有，個股的波動大於樓價指數係另一優點，可以當係槓桿，不需要用全部買樓的資金去買創科，而係可以用波幅估計，按比例咁買。
比如Case-Shiller由C位升返上來，升了近兩成，而創科就升了差唔多四倍，但由於近日基數大了，可以估計現時的波幅大概係Case-Shiller的五至八倍左右。
如果買家本來打算用500萬港元買美樓，理論上，現在用六七十萬買創科，就可以賺到相近的回報，一般槓桿要比息銀行，但這組合仲可收息，因為剩下的錢可以用來買債券收息，那麼就算創科輸幾年輸了五成，組合都不怎蝕錢。
換個角度看，是用創科加債券做出了一個美國樓市的認購期權收息組合。當然，一隻股票有太多原因可以突變，例如管理層、股東增/減持、大行評級，但這隻創科在過去十年都有盈利，連在金融海嘯時都賺錢，近六年還有雙位數字以上的盈利增長，過去十年都有派息，講真naked buy我都夠膽，更何況現在是代替美國買樓，最多係着數多蝕底少啫。
先旨聲明，上面所說的買賣方法，前題是你必須睇好美國樓市，才會去做，因為創科本身係領先美國樓市，而用落後指標去炒領先的股票，係違背了trader的炒賣法則；相反，利用創科走勢來評估美國樓價，才是王道。
所以，要睇美國樓市炒唔炒爆，就睇669；至於香港樓市爆唔爆，就睇689囉。
張士佳
註：筆者持有創科（669）股票