有「港大飯堂」之稱嘅莎厘娜餐廳（Czarina），2013年因為賣舖後租唔番，無奈下執咗笠，前日老闆王殿華（王叔）細仔王宗俠喺facebook徵集老照片，原來8月莎厘娜餐廳返嚟喇，仲改咗個招牌做「莎厘娜餐廳1964」，而且會賣埋酒，強勢回歸第一擊係要收集那些年的餐廳舊照。
保留特色俄菜
王宗俠細個喺英國讀餐飲，舊年餐廳結束打算轉行賣樓，考咗經紀試，但係覺得呢行唔啱自己，於是同老竇王叔、媽媽Czarina商量下，再同朋友集資夾錢，8月會喺西營盤高街再開千呎餐廳。今次大計係保留特色四式俄國菜，包括羅宋湯、雜錦冷盤、俄羅斯牛柳飯同串燒牛柳。特色甜品俄羅斯布丁都會重新上場，佢哋仲會賣埋酒、開夜啲，港大同學仔又有多個落腳點啦。新店應該可以開到40張枱，設計用番木材，餐椅可能用番以前嘅款式，王宗俠希望有多啲懷舊感，於是呼籲大家一齊送出舊相，畀佢放喺新舖，留住集體回憶。
而早年不幸患胃癌嘅王叔，𠵱家好返喇，佢仲會同老婆Czarina做生招牌出席8月開張。以前般含道年代，俄國雜肉沙律賣130蚊、羅宋湯45蚊，牛柳餐170蚊，王宗俠話做唔番呢個價，舖租、人工、物價開支大咗會加價，所以主打港大教職員。港大地理系教授詹志勇1970年代讀港大時，已經幫襯開啦，佢話新開張之後一定要再去，因為新學制後，學校人多，搵食艱難，平日只靠三文治醫肚咋。
李八方
mailto:[email protected]