一連兩日因天氣太壞，大雨連場，朋友午飯之約取消，因大家都唔係好想出門濕身，或者搵唔到的士之類，你知啦，每逢落大雨，街道上就極難搵到一部的士，公關L就試過在堅尼地道港燈總部附近搵的士到德己立街「陸羽阿二」（即香港大學校友會會所）吃午飯，呆等四十五分鐘都冇一架的士睬佢，唯有索性「罷食」幾小時。
午飯約會，既然有改，於是等到午飯黃金時間過後先至一個人走到威靈頓街翠華茶餐廳，呢間茶餐廳生意之旺，可講得係稱王稱霸，翠華股東一見就笑，故此特登等到兩點零鐘過後先至去，打開餐牌，有十大名菜推介，第一名就係海南雞飯，於是不假思索，嗌碟海南雞飯。好快就送到，一睇已經發覺唔係幾對路，咬一啖雞就心裏叫苦，嗌錯嘢嘞，但唔通唔食咩，於是苦住口面食完，急急鬆人。
次日又係兩點出門，呢次轉頭行去麥奀記，唔係食雲吞麵噃，而係食牛筋湯麵，唔夠喉，要多一碗牛筋撈麵，呢次食得開心嘞，直情食到蓮子蓉咁面口，啲牛筋真係掂掂掂吖嗎。又有咁啱嘅，居然撞到在金鐘返工嘅紳士L，佢又係食牛筋，含豐富骨膠原喎，於是大家坐埋一齊，紳士L就問：「UBS出咗一份評估佔中嘅報告，點睇？」人地要做生意啫，南華早報嘅Jake van der Kamp專欄就話UBS份佔中評估報告毫無新意，只能算係推銷「沽空」交易嘅說明文，何須重視。
紳士L就話最近有人鼓動啲商會對「佔中」做啲反應，例如發表聲明反對佔中之類，兼且希望各商會聯署，聯署人愈多愈好。紳士L嘆息話：「香港已經夠多對抗，商界無謂又搞多一單，總之人人意見不同，個別商人、商會反對佔中，自己現身登廣告便可，唔需要拉埋其他人其他商會聯署，增加整體對抗性嘅啫。」紳士L並且話香港並唔係台灣咁法治不彰嘅社會，由佔中發展至佔領立法會，近乎不可能，左丁山深然其說，搞三幾日佔中靜坐，沒有甚麼大不了，置地廣場嘅租金肯定唔會因為有佔中而下調！UBS先天下之憂而憂，我地唔駛驚埋一份。