舊年美國打工仔平均年薪按年增1.4%，至40,872美元，但點都唔夠一班CEO勁，標普500成份股企業嘅CEO薪酬組合按年升13%至1,050萬美元，而且當中有15個CEO或高層年薪逾億美元，打工仔當然眼紅。
《USA Today》報告話，人工大增主要係舊年股市升得勁，帶嚟財富效應。呢15位高薪人士當中，包括Starbucks創辦人舒爾茨，舊年袋1.63億美元，其中逾1.28億美元係行使認股權所得。Google主席施密特舊年袋1,930萬美元，股份獎勵2,820萬美元，加埋今年2月追加1億美元限售股，都袋唔少。
好多人話董事局同呢班高層簡直不知民間疾苦，但有顧問就話，如果薪酬組合唔夠吸引，被其他公司撬咗個好嘅CEO走，到時員工都要受罪。