最近內地放寬「一孩政策」，唔少公司磨拳擦掌，希望可以搵機會做埋細路仔生意。體育用品股特步（1368）似乎都想食住呢條水，公司早年已經開始搞童裝，噚日宣佈要拍埋卡通片！
特步話，已跟一間中國動漫公司簽約，計劃投資3,000萬人仔拍動畫，仲請到以前有份製作《小熊維尼》、《海綿寶寶》嘅美國動畫作家Eric Shaw做總編劇，預計條片明年喺中央電視台嘅少兒頻道播出，希望用動漫營銷策略，搞產品植入，小朋友會受落咁話。
其實唔少公司都用過呢招㗎喇，好似生產兒童護理用品嘅青蛙王子（1259），都搞咗套同名卡通片，喺湖南衛視播，仲贊助埋紅爆節目《爸爸去哪兒》。不過舊年佢份業績就遠遜市場預期，似乎未見成效。所以拍卡通片，唔擔保一定生金蛋。