【銅鑼灣耀華街】曾經自認靚仔、後生同高層嘅盛品儒，雖然舊年9月因通訊事務管理局一聲令下要佢辭去亞視執行董事職務，唔再係高層，但37歲嘅佢依然好有異性緣，身邊女伴經常團團轉，就好似日前咁，記者又見佢同緋聞女友、已經成為人妻嘅91年亞姐亞軍黎虹讌去酒吧飲酒happy，之後黎虹讌仲送埋佢返屋企，真係巴閉。
當日下晝4點半左右，盛品儒同黎虹讌、吳君如細佬吳君祥、袁小曼個地產高層男友廖偉強以及另一名男性朋友喺銅鑼灣耀華街一間酒吧happy hour，佢哋坐喺門口位置飲酒吹水，黎虹讌仲講到好大聲，大聲到對面街都聽到佢把聲。
黎虹讌蹺實學生妹
不過，盛品儒傾偈期間都不時𥄫吓門口，好小心咁睇吓有冇記者喺度。一行多人飲到傍晚6點左右離開嗰陣，有個着住校服嘅學生妹嚟會合黎虹讌，仲蹺晒手，估計係黎虹讌個囡囡。
盛品儒同各人揮手拜拜之後，行咗去時代廣場間city'super買飲品同洗頭水，佢匆匆買完畀錢之後就邊玩電話邊行去停車場。原來黎虹讌同囡囡專登喺停車場等埋盛品儒，然後親自揸車送佢返去北角形品豪宅，認真體貼。
採訪、攝影：畢紹基、徐錦池、梁繼光