【第33屆香港電影金像獎頒獎禮之殭屍女將】一部出色電影，主角和配角的演技都要配合得天衣無縫，鮑起靜和惠英紅兩位好戲之人，惺惺相惜，在電影《殭屍》中大鬥演技，她們分別獲提名「第33屆香港電影金像獎」最佳女主角及最佳女配角，鮑姐面對勁敵《一代宗師》的章子怡，自知贏面不大，寄望好拍檔小紅可摘下金像女配。
撰文：比華利、楊潔雯
繼《天水圍的日與夜》後，鮑起靜去年再遇到一個狙擊金像獎最佳女主角的《殭屍》好角色梅姨，鮑姐日前受訪時說：「能夠拍到一部好電影之餘，可以受到咁多人歡迎同讚賞，仲能夠提名女主角，真係非常幸運！我知有人話鮑姐今年唔會攞獎，係，係事實，一定唔會攞獎，獎項只有一個，只可以畀最好嗰個演員，能夠提名，我覺得5個都係咁好，都係付出咗好多好多努力，但係我哋要睇整個電影對香港、對世界有乜更大影響，咁當然係非《一代宗師》莫屬。」
鮑姐心裏有數，章子怡是勝券在握：「章子怡係做得幾好、幾努力，唔好淨係講武打，文戲表現都非常細緻，所以話章子怡攞最佳女主角係實至名歸，輸畀佢係心服口服。」
頒獎台上，牌面輸了給《一代宗師》，不過論實力及誠意，《殭屍》絕對是佳作，連李安、侯孝賢及王家衛等國際級導演都讚口不絕，鮑姐說：「今次聽到好多好導演、好演員，例如陳可辛、甄子丹都話鍾意，最開心係王家衛導演話《殭屍》好好，嗰時開心過攞獎。」
寄望小紅攞獎
對於惠英紅在《殭屍》同樣表現出眾，鮑姐現將爭獎重任交予小紅：「其實《殭屍》係有兩個女主角，就係小紅同埋我，不過今次佢就報個女配角，雖然係委屈咗佢，佢今次提名，我係非常睇好佢，好希望同行畀個機會佢攞呢個獎，尤其係《殭屍》入面，佢比我付出更多，抑壓同抑鬱，更加需要內在感情流露，佢掌握得好好！」
場地：Wheatfield Kitchen
兩度封金像獎影后的惠英紅，今屆憑電影《殭屍》提名最佳女配角，雖然面對羅蘭、劉嘉玲等勁敵，小紅仍信心十足，她日前受訪時說：「女配看似冇女主角提名壓力咁大，其實女配比主角仲緊要，女配要輔助主角發揮出嚟，佢嘅功力要深厚好多。女配等同調味料，帶出餸菜鮮味，冇綠葉扶持，朵花幾靚都冇用。」
小紅在《殭屍》中扮精神失常女子，她說：「角色性格好淡，唔係話有一場戲吸睛，演繹好講內心戲。」回想當日陳自強幫導演麥浚龍（Juno）力邀她演出，小紅說：「我唔知佢講嘅Juno就係唱歌嗰個，仲以為係外國返嚟嘅新導演，點知去到開會，發現係呢個Juno，我立即想縮沙，心諗仆街啦，你呢個富二代要玩，唔好搵我墊屍底，我唔想接部爛片拖跨形象！」
曾與Juno開拖
由於被妹妹力勸，小紅最後守諾照拍，開工首日，小紅跟Juno一拍即合：「睇佢擺位、roll機同叫停，睇得出佢係有料。」Juno的過份堅持最終跟小紅開拖，她說：「尾場有一幕講我用手抗殭屍，替身太大力，我右手痛到差啲鬆骹。我停機即同Juno講拍唔落去，佢死拗話得，我心諗咁搏我隻手隨時玩完，我反駁叫Juno自己試，佢即刻應承。我哋拗到火紅火綠，副導武指出言分析勸止，Juno先肯妥協。」這件事竟令小紅對Juno加分，對於能否摘下女配，她以平常心面對：「今次提名個個都有份量，邊個贏我都輸得心服口服。」
場地：RIO
服裝：Weekend by Max Mara
《殭屍》9項提名
最佳女主角：鮑起靜
最佳男配角：陳友
最佳女配角：惠英紅
新晉導演：麥浚龍
最佳攝影：伍啟銘
最佳美術指導：張蚊
最佳服裝造型設計：鄭秀嫺、黃家儀、Kittichon Kunratchol
最佳音響效果：朱致夏、Steve Miller
最佳視覺效果：Enoch Chan
資料來源：香港電影金像獎協會