係人都估到拜仁慕尼黑喺上周六作客對奧格斯堡場德甲會出弱陣，但估唔到會弱成咁，結果亦出事輸0:1，兼有梳頓沙基利傷出要唞數周，乜嘢紀錄都斷晒，包括連續不敗及連續入波等等，為對紅魔搞成咁，值得咩？
拜仁為咗留力踢禮拜三迎英超曼聯嘅歐聯8強次回合，教練哥迪奧拿收起逾半隊主力，改出弱陣，當中仲有3個𡃁仔米素爾韋沙、賀積查治同埋沙拿希，結果咁就出事，喺31分鐘俾主隊前鋒摩達斯射入而輸0:1，自2012年10月28日主場負利華古遜1:2後，首次喺聯賽輸波。
53場聯賽不敗告終
摩達斯呢一腳，亦斷咗拜仁多個紀錄，包括跨季53場聯賽不敗、連續65場聯賽有波入、開咧至今28場聯賽不敗，同埋作客聯賽10連勝。哥迪奧拿就此表示：「你唔可能成日都贏波，輸波只係遲早嘅問題。我哋輸波唔係因為派咗年輕球員落場，佢哋都訓練有素，知道點踢同我要啲乜。我哋輸波係因為對手踢得好過我哋，所以我亦冇嘢好投訴。」
俾德國版《Elle》選為年度性感男人第3名嘅哥迪奧拿話：「我哋要接受事實，盡快收拾心情備戰對曼聯場波。禮拜三場比賽好比決賽，仲係關乎生死。」另外，多蒙特喺夜場靠羅拔利雲度夫斯基同馬高列奧斯各入一粒，主場反勝禾夫斯堡2:1，家陣多第4位嘅慕遜加柏10分，好有機會入前3以直入下屆歐聯。
紅魔超新星候命
拜仁輸波，但曼聯同日卻贏波，喺英超作客大勝紐卡素4:0。紅魔領隊莫耶斯都留力，將迪基亞同尼曼查維迪列為後備。由於朗尼因腳趾受傷缺陣，莫耶斯將18歲嘅占士威爾遜放喺後備席；占士威爾遜被認為係紅魔嘅超新星，若然朗尼趕唔切復出鬥拜仁，唔知莫耶斯會唔會博一博放佢落場呢？
