常說娛樂圈是大染缸，梁家輝浸淫圈中超過30年，人生閱歷有多豐富，可想而知。日前他與陳慧琳（Kelly）及鄭伊健為新片《盜馬記》接受本報專訪，他就像一位人生講師，課題包含演戲，但萬變不離其宗，目的就跟《盜》片一樣，希望為港人打打氣，發放正能量。
撰文：文國駿
要說《盜馬記》必先提到UFO，90年代創立的UFO電影公司專拍貼近民生的輕鬆小品，例如《新難兄難弟》及《流氓醫生》等，無獨有偶，以上兩片及《盜》片皆由李志毅執導，梁家輝說：「上年拍《迷離夜》先同李志毅合作番，佢發現Kelly有喜劇感，結果大家就埋班。」家輝表示《盜》片看似輕鬆盜寶片，但極有UFO年代港產片味道：「戲中Kelly處於尷尬階段，工作環境搵唔到理想對象。呢樣嘢代表香港好多人，長期營營役役，好多年輕人冇咗理想，希望借電影抽離，去比較童話嘅夢幻國度，吸收多啲正能量。」
欣賞伊健生活態度
電影於布拉格取景，首次踏足當地的家輝形容是「天賜機會」，更大讚捷克政府配合當地發展，令大部份建築仍留有中古時代的味道。香港的保育常被批評做得不夠，家輝則說：「保育一定有需要，但香港係經濟城市，要平衡都唔係咁易。但我哋可以諗吓，維港未填海時，有幾多土生土長香港人係真心欣賞過？我哋爭取同時要諗以前有冇盡過力，如果係咁放自己喺呢個位置，只會負面情緒越嚟越大，我哋要保持正能量。」
對於跟Kelly及伊健合作，家輝說：「開頭以為Kelly幾cool，原來係儍大姐。伊健就係一個好專一嘅人，佢結咗婚都係大細路，不過我覺得佢呢種生活態度好好。我哋合作第一部戲時，嗰陣電影圈好艱難，我哋合作咗一部好爛嘅戲，可以話係半被迫拍，我哋講開理想，佢話有間dream house想買，我話如果你夢想係買一間屋，你喺呢行要面對好多嘢，唯一可以盡力去做……今次佢話夢想實現咗，間屋仲已經賣埋㖭！」
感激家人全心支持
問到演戲生涯還有甚麼突破？已是多屆影帝的家輝淡然地說：「作為演員，最幸福嘅唔係去賺名譽同獎，最大滿足係通過不同故事、角色，去享受人哋嘅感情同生活角度，好似我可以喺受保護情況下扮演軍人，經歷戰爭，我唔願意經歷佢哋嘅生活，但我可通過電影去吸收生命某啲精華。」他又讚家庭對他的支持很大：「有演員婚後唔准拍kiss戲，我父母、太太同兩個女都唔會過問我工作，佢哋係上天畀我最大嘅恩賜！」